काठमाडौँ — लगातारको वर्षा, पहिरो र सडक कटानका कारण देशका एक दर्जनभन्दा बढी मुख्य राजमार्ग तथा सडकखण्डहरू पूर्ण तथा आंशिक रूपमा अवरुद्ध भएका छन्। प्रहरी प्रधान कार्यालयले आज बिहान ५ बजे सार्वजनिक गरेको विवरण अनुसार बाढी र पहिरोको उच्च जोखिमका कारण देशभरको यातायात सेवा प्रभावित भएको हो।
बिपी राजमार्ग र कान्ति लोकपथमा रात्रिकालीन यात्रामा रोक
काभ्रेपलाञ्चोक र सिन्धुली जोड्ने बिपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा बाढीको जोखिमलाई मध्यनजर गर्दै साँझ ६ बजेदेखि बिहान ४ बजेसम्म सवारी सञ्चालनमा पूर्ण रोक लगाइएको छ। यो खण्डमा बिहान ४ बजेदेखि साँझ ६ बजेसम्म मात्र सवारी चलाउन पाइनेछ। यस्तै, कान्ति लोकपथमा पनि वर्षाका कारण हुन सक्ने दुर्घटना रोक्न साँझ ५ बजेदेखि बिहान ५ बजेसम्म यातायात सञ्चालनमा प्रतिबन्ध लगाइएको छ।
इलाम, सिन्धुपाल्चोक र दोलखाका सडकको अवस्था
मेची राजमार्गअन्तर्गत इलाम नगरपालिका–९ राजदुवालीमा सडक अत्यधिक हिलाम्मे भएकाले यातायात पूर्ण रूपमा अवरुद्ध भएको छ, जहाँ हाल वैकल्पिक मार्ग प्रयोगमा ल्याइएको छ। अरनिको राजमार्गअन्तर्गत सिन्धुपाल्चोकको जिरोकिलो, कोदारी र लिपिङ क्षेत्रमा पहिरो जानुका साथै सडक भासिएकाले आवतजावत ठप्प छ। लामासाँघु–रामेछाप सडकखण्डको किर्नेटारमा सामाकोशी खोलाले सडक बगाएकाले खिम्ती ग्रामीण विद्युत् सहकारीको परिसर हुँदै वैकल्पिक बाटो सञ्चालन गरिएको छ।
हिमाली तथा पहाडी जिल्लाका अन्य अवरुद्ध राजमार्गहरू
म्याग्दीको बैसेरी र भिरकाटे तथा मुस्ताङको कैकु खोलामा सडक कटान र पहिरो जाँदा बेनी–जोमसोम सडकखण्ड पूर्ण रूपमा ठप्प बनेको छ। यसका साथै गुल्मीको रुरुक्षेत्रमा सुक्खा पहिरोका कारण मदन भण्डारी राजमार्ग, रसुवाको पासाङ ल्हामु सडक, मुगुको नाग्म–गमगढी सडक, बागलुङस्थित कालीगण्डकी करिडोर र रुकुम पश्चिमको भेरी करिडोर पनि पहिरोका कारण पूर्ण रूपमा अवरुद्ध भएका छन्।
वर्षायाममा बाढी, पहिरो र सडक कटानको जोखिम अझै कायमै रहेकाले यात्रामा निस्कनुअघि अनिवार्य रूपमा नजिकैको प्रहरी कार्यालय वा सम्बन्धित निकायमा सम्पर्क गरी सडकको ताजा अवस्था बुझ्न प्रहरीले सबैमा अपिल गरेको छ।
प्रतिक्रिया
सम्बन्धित खवर
