काठमाडौं। संस्कृति, पर्यटन तथा नागरिक उड्डयन मन्त्री बद्री प्रसाद पाण्डेको प्रमुख आतिथ्यतामा “४६औं पर्यटक प्रहरी दिवस, २०८१” नेपाल पर्यटन बोर्ड, भृकुटीमण्डपमा भव्यताका साथ सम्पन्न भयो।
मन्त्री पाण्डेले पर्यटक प्रहरी कार्यमा विशेष योगदान पुर्याउने संघसंस्था र व्यक्तित्वहरूलाई प्रशंसापत्र प्रदान गर्नुभयो। उहाँले पर्यटकको सुरक्षा, समस्या समाधान, र गुनासो सम्बोधनमा पर्यटक प्रहरीले प्रदर्शन गरेको उत्कृष्ट व्यवहारको प्रशंसा गर्दै पर्यटनको प्रवर्द्धन, विकास, र समृद्धिमा सबै सम्बद्ध निकायले आ-आफ्नो दक्षता अभिवृद्धि गर्नुपर्नेमा जोड दिनुभयो।
पर्यटक प्रहरीको योगदानप्रति सम्मान
प्रहरी महानिरीक्षक (आईजीपी) बसन्त बहादुर कुँवरले उत्कृष्ट कार्य गर्ने पर्यटक प्रहरी कर्मचारीहरूलाई प्रशंसापत्र प्रदान गर्नुभएको थियो। उहाँले पर्यटकहरूको सुरक्षामा पर्यटक प्रहरीको भूमिकालाई सराहनीय बताउँदै, यस कार्यमा सबै सरोकारवाला निकायको समन्वयात्मक भूमिका आवश्यक रहेको उल्लेख गर्नुभयो। साथै, “नेपाललाई सुरक्षित पर्यटन गन्तव्यका रूपमा विश्वभर चिनाउन आवश्यक छ,” भन्दै समग्र पर्यटन क्षेत्रको विकास र प्रवर्द्धनमा नेपाल प्रहरी सदैव कटिबद्ध रहने प्रतिबद्धता व्यक्त गर्नुभयो।
विशेष उपस्थिती र शुभकामना मन्तव्य
कार्यक्रममा संस्कृति, पर्यटन तथा नागरिक उड्डयन मन्त्रालयका सचिव बिनोदप्रकाश सिंह, नेपाल पर्यटन बोर्डका कार्यकारी अधिकृत दीपकराज जोशी, र नेपाल एसोसियसन अफ र्याफ्टिङ एजेन्सीका निवर्तमान अध्यक्ष शिव अधिकारीले शुभकामना मन्तव्य व्यक्त गर्नुभयो।
सांस्कृतिक प्रस्तुति र जानकारी
कार्यक्रमको प्रारम्भमा प्रहरी नायव उपरीक्षक रिपेन्द्र कुमार सिंहले पर्यटक प्रहरीसम्बन्धी संक्षिप्त जानकारी प्रदान गर्नुभएको थियो। साथै, नेपाल प्रहरी संगीत विद्यालयबाट सांस्कृतिक प्रस्तुति गरिएको थियो।
धन्यवाद ज्ञापन
पर्यटन विभागका महानिर्देशक डा. नारायण प्रसाद रेग्मीले कार्यक्रम सफल बनाउन सहयोग गर्ने सबैलाई धन्यवाद ज्ञापन गर्नुभयो।
यस अवसरमा वरिष्ठ प्रहरी अधिकृतहरू, पर्यटन क्षेत्रका विशिष्ट व्यक्तित्वहरू, र अन्य सरोकारवाला निकायका प्रतिनिधिहरूको उपस्थिति रहेको थियो।
प्रतिक्रिया
सम्बन्धित खवर
