काठमाण्डौं— नेपालको सडकमा बर्सेनि सयौँ नागरिकको ज्यान लिने दुर्घटनाहरूको पीडा, अस्पतालको शैयामा अकालमै श्वास तोडिरहेका घाइतेहरूको करुण क्रन्दन र गाउँ–सहरका अनाथ भएका बालबालिकाको आँधी बेहोर्ने पीडित परिवारहरूको करुण कथा—यी सबै दृश्य हाम्रो सामु कहिल्यै अन्त्य नहुने दैनिकी बनेको छ ।

तर, यस्तो भयावह परिस्थितिमा पनि केही प्रहरी अधिकृतहरू छन्, जसले आफ्नो कार्यक्षमता, प्रतिबद्धता र परिणामले राष्ट्रलाई आशाको उज्यालो देखाएका छन् । तीमध्ये प्रहरी निरीक्षक (इन्स्पेक्टर) बिमला कुमारी कठायत एउटा प्रखर नाम हो, जसलाई कुनै पनि जिल्लाको ट्राफिक प्रहरी इन्चार्ज बनाउनु अब विकल्प होइन—राष्ट्रको बाध्यता हो ।

२०४६ साल वैशाख २४ गते सुदूरपश्चिम प्रदेशको डडेल्धुराको अजयमेरु गाउँपालिका–१ मा जन्मिएकी कठायतले २०६६ साउन २५ गतेबाट नेपाल प्रहरीमा सेवा सुरु गरिन् । आफ्नो कठिन र चुनौतीपूर्ण प्रहरी यात्रा उनले काठमाडौंको थापाथली ट्राफिक कार्यालयदेखि मधेस प्रदेशको रौतहट जिल्ला ट्राफिक प्रमुखसम्म पुर्‍याइन् ।

२०७६ वैशाख ५ गते प्रहरी निरीक्षकको पदमा पदोन्नति पाएपछि उनले देखाएको कार्यक्षमता, नेतृत्व क्षमता र दृढताले प्रहरी सेवामा उनको पहिचानलाई नयाँ उचाइमा पुर्‍यायो ।

रौतहट ट्राफिक प्रमुखको रुपमा २०७९र८० सालमा उनले पाएको परिणाम नेपालका ट्राफिक प्रहरीको इतिहासमै उदाहरणीय छ—अघिल्लो वर्ष ७२ जना नागरिकको ज्यान लिने सडक दुर्घटनाको दर घटाएर आफ्नो कार्यकालमा ५० मा सीमित पारिन् ।

यो केवल आँकडाको सुधार मात्र होइन, पचासौँ परिवारको जीवनमा बाँच्ने आशा भर्न सक्ने ऐतिहासिक उपलब्धि हो । यसका साथै, ट्राफिक राजस्व असाधारण रूपमा वृद्धि गर्न सक्नु, सडक सुरक्षा चेकजाँचलाई व्यापक र प्रभावकारी बनाउनु र विशेषगरी मादक पदार्थ र लागूऔषध सेवन गरेर सवारी चलाउनेहरूलाई कानूनी दायरामा ल्याउनु—यी सबै उनको दृढ प्रतिबद्धताको प्रमाण हुन् ।

उनको कार्यशैली केवल दण्ड–दण्डको सीमामा अड्किँदैन । हरेक गाउँ, टोल, बस्ती, विद्यालयदेखि सडकसम्म पुगेर जनचेतनामूलक कार्यक्रम सञ्चालन गर्नु उनको प्रमुख रणनीति थियो । यस्तो मानवीय र जनमुखी दृष्टिकोणकै कारण उनी मधेस प्रदेश ट्राफिक प्रहरी कार्यालय, मधेस प्रदेश प्रहरी कार्यालय र नेपाल अटोमोबाइल्स एसोसिएसन (नाडा)बाट समेत कदरपत्र र नगद पुरस्कार पाउँदै सम्मानित भइन् ।

आज उनी इलाका प्रहरी कार्यालय पशुपतिनगर, हेटौडा मकवानपुरको प्रमुखको रुपमा कार्यरत छिन् । यस कार्यालयको जिम्मेवारी हेटौडा उपमहानगरपालिकाका १० वटै वडा क्षेत्र र मनहरी गाउँपालिकाको दुईवटा वडा सम्हाल्ने हो ।

यहाँ पनि उनले लागूऔषधविरुद्ध व्यापक अभियान सञ्चालन गरिन् । चोरी–तस्करी नियन्त्रणमा उल्लेखनीय योगदान दिइन् । र फरार अभियुक्तहरूलाई नियन्त्रणमा ल्याउँदै स्थानीय समुदायको विश्वास जितिन् । यसैले यहाँको समुदायमा उनी केवल प्रहरी अधिकारी मात्र होइन, सुरक्षाको पर्याय बनेकी छन् ।

नेपाल सरकार, गृह मन्त्रालय र प्रहरी प्रधान कार्यालयलाई अब स्पष्ट निर्णय लिनुपर्ने बेला आएको छ—ट्राफिक व्यवस्थापनमा असाधारण दक्षता देखाइसकेकी कठायतलाई पुनः ट्राफिक प्रहरीको जिम्मेवारी दिनुपर्छ । किनकि, सवारी दुर्घटनाको त्रासमा बाँचेका नेपालीको जीवन र सुरक्षालाई यस्ता सक्षम, प्रतिबद्ध र परिणाममुखी नेतृत्वकर्ताले मात्र बचाउन सक्छन् ।

नेपालको सडक सुरक्षा केवल नियमको किताबमा लेखिएको धारामा सुधार गरेर सम्भव हुँदैन । त्यसका लागि चाहिन्छ—मैदानमा खटेर जीवन जोखिममा राख्ने, नियमलाई न्यायसँग लागू गर्ने, जनतालाई सहयात्री ठान्ने, र परिणामको स्पष्ट उदाहरण देखाउन सक्ने प्रहरी नेतृत्व ।

कठायतको विगतको सफलताले देखाएको छ—यदि उनलाई उचित जिम्मेवारी दिइयो भने, दुर्घटना नियन्त्रण, सडक सुरक्षा, र ट्राफिक व्यवस्थापनमा नेपालले अभूतपूर्व परिवर्तन देख्नेछ ।

आज, जब सडकमा जीवन र मृत्युको सीमा केवल केही सेकेन्डको हुन्छ र जब राष्ट्रका सडकहरू लापरवाही र अपराधको खेलमैदान बन्ने खतरा बढ्दो छ । त्यस्तो घडीमा कठायतजस्तो साहसी, संवेदनशील र सक्षम नेतृलाई ट्राफिक प्रहरीको नेतृत्वमा फर्काउनु राष्ट्रको कर्तव्य हो ।

यो केवल पदस्थापनको निर्णय मात्र होइन—हजारौँ नेपालीको जीवन र सुरक्षा सुनिश्चित गर्ने ऐतिहासिक कदम हुनेछ ।

(स्कुप खबर बाट …)