काठमाडौँ — सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछानेले मुलुकको वर्तमान परिस्थिति अत्यन्त संवेदनशील रहेको भन्दै शान्ति सुव्यवस्था र सामाजिक सद्भाव कायम राख्नु नै अहिलेको प्रमुख दायित्व भएको बताएका छन्। बुधवार सिंहदरबारमा सम्पन्न सर्वदलीय बैठकपछि सञ्चारकर्मीहरूसँग कुरा गर्दै उनले यस्तो धारणा राखेका हुन्।
हिजो र आजको आन्दोलनको पृष्ठभूमि फरक रहेको उल्लेख गर्दै लामिछानेले आन्दोलनका क्रममा नागरिकको ज्यान जानु अत्यन्त गम्भीर विषय भएको र यसमा सुरक्षा निकाय पूर्ण रूपमा जिम्मेवार तथा जबाफदेही हुनुपर्नेमा जोड दिए।
पत्रकारहरूसँगको कुराकानीमा सभापति लामिछानेका मुख्य भनाइहरू:
निष्पक्ष छानबिनमा जोड: घटनाको सत्यतथ्य बाहिर ल्याउन केही समय लाग्ने भएकाले कुनै पनि किसिमका अफवाह वा भ्रामक सूचनाको पछि नलाग्न आग्रह।
संयमता र सहकार्य: राजनीतिक दलहरूले एक-अर्कामाथि आरोप-प्रत्यारोप गर्नुभन्दा संयम अपनाएर जिम्मेवार प्रशासनलाई निष्पक्ष छानबिनका लागि सहयोग गर्नुपर्ने।
स्थिति फरक: विगतमा अभिव्यक्ति स्वतन्त्रता र सामाजिक सञ्जालमाथिको प्रतिबन्धलाई लिएर आन्दोलन भएको स्मरण गराउँदै अहिलेको अवस्था त्योभन्दा भिन्न रहेकाले भ्रमबाट बच्नुपर्ने।
मिडियाको भूमिका: सामाजिक सद्भाव नभड्कियोस् भन्नका लागि सञ्चारकर्मीहरूलाई थप संवेदनशील र जिम्मेवार भई सूचना सम्प्रेषण गर्न अपिल।
सर्वदलीय बैठकमा शीर्ष नेताहरूले वर्तमान घटनाक्रमको समीक्षा गर्दै सरकारको ध्यानाकर्षण गराएको र प्रधानमन्त्री तथा गृहमन्त्रीले आ-आफ्नो तर्फबाट काम गरिरहेको उनले जानकारी दिए। सानातिना विषय र कसले के बोल्यो भन्नेतर्फ नअल्झिई अनुसन्धानको निष्कर्ष नआएसम्म धैर्यता अपनाउनु नै अहिलेको मुख्य प्राथमिकता रहेको उनको भनाइ थियो।
प्रतिक्रिया
सम्बन्धित खवर
