पूर्व प्रहरी अधिकृत रेशम पराजुलीले हाल व्यक्तिगत जीवन बिताइरहँदा समाजका विभिन्न तहका व्यक्तिहरू, विशेषगरी युवापुस्तासँगको संवादका क्रममा पाएका अनुभव र गुनासोका आधारमा उच्च प्रहरी अधिकृतहरूसँग एउटा महत्वपूर्ण अनुरोध राखेका छन्।

उनका अनुसार, केही व्यक्तिहरू सामाजिक सञ्जाल—फेसबुक, टिकटक, इन्स्टाग्राम—मार्फत आफ्नो गैरकानुनी गतिविधि छोप्न उच्च प्रहरी अधिकृतसँग सम्बन्ध जोड्ने प्रयास गर्छन्। सार्वजनिक स्थान, कार्यक्रम वा व्यक्तिगत भेटमा फोटो खिचेर जन्मदिन वा वैवाहिक वर्षगाँठ जस्ता अवसरमा पोष्ट गर्ने यी व्यक्तिहरू प्रहरी प्रशासनको समर्थन रहेको झूठ प्रचार गर्छन्।

“यी प्रवृत्तिले प्रहरीको इज्जतमा कलंक लगाउँछ। समाजमा हैसियतविहीन भए पनि फोटो र सम्बन्धको माध्यमबाट डर देखाउँदै आफ्नो गलत काम मलजल गर्छन्। प्रहरीमा ९९% अधिकृत योग्य र व्यवसायिक छन्, तर १% व्यक्तिले सबैको छवि धूमिल बनाउने खतरनाक अवस्था सिर्जना गर्न सक्छन्,” डिएसपी पराजुलीले बताए।

पूर्व अधिकृतले थपे कि जन्मदिनको अवसरमा होटलमा केक काट्ने, ब्रान्डेड उपहार दिने, सामाजिक सञ्जालमा भाइरल हुने प्रयास गर्ने र सम्बन्धको धाकले आफ्नो गैरकानुनी कामलाई सजिलो बनाउने प्रवृत्ति धेरैमा देखा परेको छ। रिटायर वा सरुवा हुँदा पनि यी गतिविधि रोकिँदैन; नयाँ अधिकृतलाई पनि चङ्गुलमा फसाउने प्रयास गरिन्छ।

उनी प्रहरी अधिकृतहरूलाई सतर्क रहन र आफ्नो छवि सुरक्षित राख्न आग्रह गर्दै भन्छन्:

“मैले थाहा पाएसम्मको कुरा समेटेर मेरो धर्म पूरा गरेँ। अब सतर्क हुनु तपाईंको जिम्मेवारी हो। मौलाएको ‘दाइ संस्कृति’ र यसको विकृतिले संगठनको इज्जतमा नकारात्मक असर पुर्याउन सक्छ।”

पूर्व अधिकृतले अन्त्यमा जोड दिए:

“यो व्यक्तिगत रूपमा कसैप्रति लक्षित छैन; लक्षित छ भने केवल संगठनको हितार्थ। सत्य कुरा स्वीकार गर्नु र सतर्क रहनु अत्यावश्यक छ। जय नेपाल।”

— यो लेख पूर्व डिएसपी रेशम पराजुलीको अनुभव ,फेसबुक स्टाटसबाट तयार पारिएको हो।