काठमाडौँ– पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले दरबार हत्याकाण्डबारे आफूले भूमिगत कालदेखि नै आवाज उठाउँदै आएको बताउँदै त्यसको छानबिन हुनुपर्ने धारणा पुनः व्यक्त गरेका छन्।

शनिबार समाजवादी मोर्चाद्वारा आयोजित पत्रकार सम्मेलनमा बोल्दै अध्यक्ष प्रचण्डले दरबार हत्याकाण्डको सत्यतथ्य पत्ता लगाउन छानबिन आवश्यक रहेको बताए। उनले भने, “मैले पहिले नै दरबार हत्याकाण्डबारे छानबिनको माग गर्दै आएको हुँ, मेरो धारणा अझै यथावत् छ। म जनताको पक्षमा बोलेको हुँ।”

उनले समाजवादी मोर्चा सरकारमा जाने टेको भएको भन्ने हल्ला निराधार भएको बताउँदै मोर्चाका लागि प्रतिवेदन तयार गर्न समय लागेकाले बैठक बस्न ढिलो भएको स्पष्ट गरे।

समाजवादी मोर्चाको लक्ष्य समाजवादी गणतन्त्रतर्फ अघि बढ्नु रहेको उल्लेख गर्दै प्रचण्डले वैज्ञानिक समाजवाद स्थापनाका लागि मोर्चाले नयाँ संकल्प लिएको बताए। “ग्रामीण अर्थतन्त्रको विकास, जनताको जीवनमा परिवर्तन, गणतन्त्र पक्षधरहरूलाई एकजुट गर्ने प्रयास भइरहेको छ,” उनले भने।

सरकारमा रहँदा उठाइएका भ्रष्टाचार र सुशासनका मुद्दा आफूले निरन्तर उठाइरहेको बताउँदै प्रचण्डले जनताको कुनै पनि हक कटौती नगरिएको दाबी गरे। साथै, सबै धर्म र परम्पराको रक्षा गर्ने दिशामा सरकार अघि बढिरहेको पनि उनले स्पष्ट पारे।