काठमाडौँ — प्रहरीले सिनामंगलबाट झन्डै ४.२५ किलो कोकिनसहित दुई भारतीय र एक थाई महिलालाई पक्राउ गरेको छ। लागुऔषध नियन्त्रण ब्युरोका अनुसार भारतीय नागरिक मुरचलेन्ड हुसेन र जेभियर म्याथ्यु थालियाचेरी शनिबार, र थाई महिला रुसानी कामा  सोमबार पक्राउ परेका हुन्।

उनीहरु लाओसबाट सिंगापुर र थाइल्यान्ड हुँदै नेपाल आएका थिए। भारतीय नागरिक हुसेन भारतबाट कोकिन ल्याउन आएको पुष्टि भएको छ। पक्राउ परेका बेला सिनामंगलको होटलबाट बरामद गरिएको कोकिनको कुल परिमाण ३ किलो ७५० ग्राम भारतीय नागरिकसँग र ५५० ग्राम थाई महिलासँग फेला परेको हो।

ब्युरोका सह-प्रवक्ता डिएसपी जीवन निरौलाका अनुसार भारतीय नागरिकले कफी प्याकेटभित्र र थाई महिलाले क्याप्सुल बनाएर निलेर ल्याएको कोकिन चिकित्सकीय विधिबाट पेटबाट बाहिर निकालिएको छ। बरामद कोकिनको बजार मूल्य करिब १२ करोड रुपैयाँभन्दा बढी रहेको प्रहरीले जनाएको छ।

प्रारम्भिक अनुसन्धानले विदेशस्थित गिरोहले निश्चित रकमको प्रलोभनमा उनीहरुलाई भरिया बनाएर प्रयोग गरेको देखाएको छ। यसअघि पनि सोही रुटबाट नेपाललाई ट्रान्जिट गरेर भारततिर लागुऔषध लैजानुका घटना सार्वजनिक भइसकेका छन्।

पछिल्लो समय लागुऔषध नियन्त्रणमा प्रहरी टोली निकै सक्रिय र प्रभावकारी रूपमा लागिरहेका छन्, जसलाई नागरिकहरूले पनि प्रशंसा गरेका छन्।