काठमाडौं । नेपाल प्रहरी को केन्द्रीय अनुसन्धान ब्यूरो (सिआईबी) ले Smart Telecom को सम्पत्ति लिलामी प्रकरणमा संलग्न रहेको आरोपमा ज्योतिप्रकाश पाण्डेलाई पक्राउ गरेको छ।

सिआईबी प्रमुख डा. मनोज केसी ले पाण्डे पक्राउ परेको पुष्टि गरेका हुन्।

प्रहरीका अनुसार सरकारले टेकओभर गरेको Smart Telecom को सम्पत्ति Ncell लाई लिलामी गरिएको विषयमा अनुसन्धान भइरहेको छ। उक्त प्रक्रियामा अनियमितता भएको आशंकामा सिआईबीले विस्तृत छानबिन अघि बढाएको जनाएको छ।

यस प्रकरणमा चार्टर्ड एकाउन्टेन्ट भेषराज लुइँटेल ले अनुसन्धानको माग गर्दै सर्वोच्च अदालतमा रिट दायर गरेका थिए। त्यसपछि सिआईबीले बैंकिङ कारोबार, ऋण प्रवाह तथा सम्पत्ति हस्तान्तरणसम्बन्धी विवरणमाथि अनुसन्धान थालेको हो।

सिआईबी स्रोतका अनुसार Smart Telecom सँग सम्बन्धित कारोबारमा बिनाधितो चार अर्ब रुपैयाँभन्दा बढी ऋण प्रवाह भएको आशंका गरिएको छ। अनुसन्धानका क्रममा Prime Bank सहित केही बैंक तथा वित्तीय संस्थाको सम्भावित मिलेमतोबारे समेत अनुसन्धान भइरहेको बताइएको छ।

यस प्रकरणमा उच्च तहका बैंक अधिकारी पक्राउ परेपछि बैंकिङ तथा वित्तीय क्षेत्रमा व्यापक चर्चा सुरु भएको छ। प्रहरीले घटनाबारे थप अनुसन्धान जारी रहेको जनाएको छ।