काठमाडौं । राज्यका दुई सुरक्षा संगठनमा एउटै परिवारबाट देखिएको उल्लेखनीय सफलता यतिबेला चर्चा र प्रेरणाको विषय बनेको छ। बाबु सुशील सिंह राठौर नेपाल प्रहरीमा एआईजी (अतिरिक्त प्रहरी महानिरीक्षक) जस्तो उच्च पदमा कार्यरत रहँदा उनकी छोरी पालक सिंह राठौर सशस्त्र प्रहरी बल (एपीएफ)मा इन्स्पेक्टर (निरीक्षक) पदमा नाम निकालेर सफलतापूर्वक तालिम पूरा गर्न सफल भएकी छिन्।

हाल नेपाल प्रहरी अन्तर्गत अपराध अनुसन्धान विभागमा कार्यरत एआईजी राठौर लामो अनुभव, नेतृत्व क्षमता र अनुशासनका लागि परिचित अधिकारीका रूपमा चिनिन्छन्। त्यही समर्पण र अनुशासनको छायाँ उनकी छोरी पालकको यात्रामा पनि देखिएको छ, जसले कठिन प्रतिस्पर्धा पार गर्दै सशस्त्र प्रहरी बल नेपाल को इन्स्पेक्टर पद हासिल गरेकी हुन्।

इन्स्पेक्टर पदका लागि हुने कडा छनोट प्रक्रिया र कठोर तालिम पार गर्नु कुनै सामान्य उपलब्धि होइन। शारीरिक क्षमता, मानसिक दृढता र नेतृत्व कौशलको कठोर परीक्षणपछि मात्रै यो सफलता हासिल गर्न सकिन्छ। पालक सिंह राठौरले यिनै सबै चुनौती पार गर्दै अन्ततः दीक्षित भएर संगठनमा औपचारिक रूपमा प्रवेश गरेकी हुन्।

तालिम सम्पन्नपछिको दीक्षान्त समारोहमा एआईजी राठौर स्वयं उपस्थित हुनु भावनात्मक क्षण बनेको थियो। एकातिर राष्ट्रसेवामा समर्पित अनुभवी प्रहरी अधिकारी बाबु, अर्कोतिर त्यही बाटो समाउँदै अघि बढेकी छोरी—यो दृश्यले उपस्थित सबैलाई प्रेरित बनाएको थियो। कार्यक्रममा बाबुको अनुहारमा झल्किएको गर्व र खुसी स्पष्ट देखिन्थ्यो।

एआईजी राठौरले सामाजिक सञ्जाल फेसबुकमार्फत छोरीसँगको तस्वीर सार्वजनिक गर्दै बधाई तथा शुभकामना व्यक्त गरेका छन्। उनले छोरीको सफलतालाई आफ्नो जीवनकै महत्वपूर्ण उपलब्धिमध्ये एक मानेका छन्।

यो संयोगले केवल एउटा परिवारको सफलता मात्र होइन, नेपालका सुरक्षा निकायमा नयाँ पुस्ताको सहभागिता र निरन्तरता पनि देखाएको छ। बाबुको अनुभव र छोरीको ऊर्जा मिलेर राष्ट्र सेवामा थप सशक्त योगदान पुग्ने अपेक्षा गरिएको छ।