दमक, झापा । झापा क्षेत्र नम्बर–५ यतिबेला मुलुककै सर्वाधिक चर्चामा रहेको ‘हेभिवेट’ निर्वाचन क्षेत्र बनेको छ। नेकपा एमालेका अध्यक्ष केपी शर्मा ओली र स्वतन्त्र उम्मेदवार बालेन्द्र शाह (बालेन) बीचको कडा प्रतिस्पर्धाको आकलन गरिएसँगै यहाँको सुरक्षा व्यवस्थालाई अभूतपूर्व रूपमा कडा पारिएको छ।

सम्भावित राजनीतिक तनाव र सुरक्षा चुनौतीलाई मध्यनजर गर्दै गृह मन्त्रालयले यो क्षेत्रलाई ‘विशेष संवेदनशिल’ सूचीमा राखेर अतिरिक्त सुरक्षा कमान्ड परिचालन गरेको हो।

सुरक्षा रणनीति र कमान्ड संरचना

सामान्यतया एउटा मात्र डीएसपीको दरबन्दी रहने यस क्षेत्रमा अहिले पाँच जना डीएसपी परिचालन गरिएको छ। निर्वाचनलाई निष्पक्ष र भयरहित बनाउन प्रत्येक स्थानीय तहमा डीएसपीको नेतृत्व रहने गरी सुरक्षा संयन्त्र तयार गरिएको हो:

• इलाका प्रहरी कार्यालय दमक: स्थायी दरबन्दी अनुसारकै नेतृत्व।

• गौरीगन्ज, गौरादह र कमल गाउँपालिका: थप गरिएका चार डीएसपीको कमान्डमा सुरक्षा परिचालन।

• अतिरिक्त जनशक्ति: कोशी प्रदेश प्रहरी कार्यालयबाट आएका १०० जनासहित कुल दुई हजारभन्दा बढी सुरक्षाकर्मी यस क्षेत्रमा मात्रै तैनाथ छन्।

‘तीन गुणा’ सुरक्षा जनशक्ति वृद्धि

जिल्ला प्रहरी कार्यालय झापाकी प्रमुख एवं एसपी वसुन्धरा खड्काका अनुसार निर्वाचनको संवेदनशीलता हेरेर साविकको तुलनामा सुरक्षा जनशक्ति तीन गुणासम्म बढाइएको छ। केन्द्रीय सुरक्षा समितिको मूल्यांकन र नयाँ तथा पुराना दलका कार्यकर्ताबीच हुन सक्ने सम्भावित झडप रोक्न यो कदम चालिएको हो।

“निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गराउन हामीले सुरक्षा व्यवस्थालाई चुस्त बनाएका छौं। जिल्लामा आवश्यक थप जनशक्ति र कमान्ड संरचना सुनिश्चित गरिएको छ,” एसपी खड्काले बताउनुभयो।