एसएसपी नवराज अधिकारीको प्रविधिमैत्री नेतृत्वमा काठमाडौँ उपत्यकाका सार्वजनिक सवारीमा सिसी क्यामरा अभियान सुरु

काठमाडौँ – अब काठमाडौँ उपत्यकाका सार्वजनिक सवारी साधन यात्रुका लागि अझ सुरक्षित र भरोसायोग्य बन्दै गएका छन्। ट्राफिक प्रहरी प्रमुख एसएसपी नवराज अधिकारीको सक्रिय पहल र दूरदर्शी नेतृत्वमा सार्वजनिक यातायातमा सिसी क्यामरा जडान अभियान औपचारिक रूपमा सुरु भएको छ।

सार्वजनिक यातायातमा बढ्दै गएको चोरी, दुव्र्यवहार, कुटपिट तथा दुर्घटनापछि चालक फरार हुनेजस्ता घटनालाई नियन्त्रण गर्न यो अभियान प्रभावकारी कदमका रूपमा अघि बढाइएको हो। बसभित्र हुने प्रत्येक गतिविधि अब क्यामराको निगरानीमा रहने भएकाले अपराध गर्नेहरूका लागि लुक्ने ठाउँ बाँकी रहने छैन।

काठमाडौँ उपत्यका प्रहरी कार्यालय प्रमुख प्रहरी अतिरिक्त महानिरीक्षक ईश्वर कार्कीले अभियानको शुभारम्भ गर्दै सार्वजनिक यातायातलाई प्रविधियुक्त बनाउनु आजको आवश्यकता भएको बताउनुभयो। उहाँले यात्रुको सुरक्षा र विश्वास बढाउन यो अभियान महत्वपूर्ण हुने विश्वास व्यक्त गर्नुभयो।

ट्राफिक प्रहरी प्रवक्ता नरेशराज सुवेदीका अनुसार यातायात व्यवसायीसँग समन्वय गरी चरणबद्ध रूपमा उपत्यकाभर सिसी क्यामरा जडान गरिनेछ। बसभित्रका गतिविधि मात्र होइन, ड्यासबोर्ड क्यामरामार्फत सडक बाहिरको अवस्था समेत निगरानी गरिनेछ, जसले दुर्घटनाको वास्तविक कारण पहिचान गर्न ठूलो सहयोग पुर्‍याउनेछ।

विशेषगरी एसएसपी नवराज अधिकारीको नेतृत्वमा ट्राफिक प्रहरी प्रविधिमैत्री, उत्तरदायी र नागरिकमुखी सेवातर्फ अघि बढेको देखिन्छ। यात्रु सुरक्षा, अनुशासन र पारदर्शितालाई प्राथमिकतामा राख्दै अघि सारिएको यो अभियान ट्राफिक व्यवस्थापन क्षेत्रमा उदाहरणीय पहल बनेको छ।

सार्वजनिक यातायात दैनिक हजारौँ नागरिकको जीवनसँग जोडिएको संवेदनशील क्षेत्र हो। यस क्षेत्रमा प्रविधिको प्रयोगमार्फत सुरक्षा सुनिश्चित गर्ने एसएसपी अधिकारीको कदम प्रशंसनीय मात्र होइन, समयअनुसारको साहसी निर्णय पनि हो।

अब काठमाडौँ उपत्यकाका यात्रु ढुक्कसँग यात्रा गर्न सक्नेछन् —
किनकि बसभित्र पनि अब सुरक्षा छ, निगरानी छ, र न्यायको आँखा खुला छ।