सुरक्षा सरोकार — निजामती सेवाको सर्वोच्च पद मुख्य सचिवका लागि एक दर्जनभन्दा बढी सचिवहरु प्रतिस्पर्धामा उत्रिएका छन्। हालका मुख्य सचिव एकनारायण अर्याल ५८ वर्ष उमेरहदका कारण मंसिर १० गते अनिवार्य अवकाशमा जाने भएपछि नयाँ नेतृत्व चयन प्रक्रियाले व्यापक ध्यानाकर्षण पाएको छ।

अन्तरिम सरकारकी प्रधानमन्त्री सुशीला कार्कीले वरिष्ठताका आधारमा मुख्य सचिव चयन गर्न सकिने संकेत देइसक्नुभएको छ। आकांक्षी सचिवहरूले प्रधानमन्त्रीलाई भेटेर आफ्नो प्रस्ताब राखेका छन् भने केहीले अवकाश دهندै गरेका मुख्य सचिव अर्यालमार्फत आफ्नो सन्देश प्रधानमन्त्रीसमक्ष पुर्‍याएका छन्।

झण्डै १ लाख निजामती कर्मचारीको केन्द्रीय कमान्ड सम्हाल्ने ‘मुख्य कमान्डर’ को रूपमा कसले बाजी मार्ला भन्ने जिज्ञासा बढ्दै जाँदा, विभिन्न अनुमान र अड्कलबाजी पनि चुलिएका छन्। २९औँ मुख्य सचिवबारे निजामती सेवाभित्र उल्लास र चर्चा दुवै उत्कर्षमा पुगेका छन्।

मंसिरको दोस्रो सातासँगै नयाँ मुख्य सचिव चयन हुने अपेक्षा गरिएको छ। वरिष्ठताका आधारमा रक्षा सचिव सुमनराज अर्याल प्रतिस्पर्धीको अग्र–सूचीमा रहेका छन्। उच्च स्रोतका अनुसार नेपाल प्रहरीमा आइजीपी चयन जस्तै निजामती सेवामा पनि सरकारले ‘वरिष्ठता–केन्द्रित’ निर्णय लिन सक्ने सम्भावना बलियो देखिएको छ।

जेन–जी आन्दोलनपछिको संवेदनशील राजनीतिक–प्रशासकीय परिवेशमा मुख्य सचिव प्रधानमन्त्रीका प्रमुख सल्लाहकारको रूपमा अझ महत्त्वपूर्ण मानिएको छ। यो पदका लागि योग्य, नैतिकवान, समन्वयकारी, कुशल, लोभ–रहित र सम्पूर्ण कर्मचारीको अभिभावक बन्न सक्ने व्यक्तित्व आवश्यक रहेको प्रशासनिक वृत्तको भनाइ छ।

रक्षा सचिव अर्यालसँगै प्रमिलादेवी बज्राचार्य, मधुसुदन बुर्लाकोटी, खगेन्द्रप्रसाद नेपाल, रामप्रसाद घिमिरे, किरणराज शर्मा प्रतिस्पर्धामा छन्। त्यस्तै गोविन्दप्रसाद शर्मा, डिल्लीराम शर्मा, राजकुमार श्रेष्ठ, गोपाल सिग्देल, रविलाल पन्थ, कृष्णबहादुर राउत, रामेश्वर दंगाल, मुकुन्दप्रसाद निरौला पनि मुख्य सचिवका आकांक्षीको सूचीमा रहेका छन्।