दिपक राज जोशी —नेपाल सरकारले प्रहरी अतिरिक्त महानिरीक्षक (एआइजी) दानबहादुर कार्कीलाई नेपाल प्रहरीको **३३औं महानिरीक्षक (आइजीपी)**मा नियुक्त गरेको छ।
सोमबार बसेको मन्त्रिपरिषद्को बैठकले आइजीपीका प्रमुख दाबेदार मानिएका कार्कीलाई प्रहरी संगठनको सर्वोच्च नेतृत्व सुम्पने निर्णय गरेको हो।
वर्तमान आइजीपी चन्द्रकुवेर खापुङ प्रहरी नियमावलीअनुसारको ३० वर्षे सेवा अवधिका कारण कात्तिक २६ गते राति १२ बजेपछि अनिवार्य अवकाशमा जान लागेका छन्।
त्यसअघि नै सरकारले नयाँ नेतृत्व चयन गरेको हो। नवनियुक्त महानिरीक्षक कार्कीले कात्तिक २७ गतेदेखि औपचारिक रूपमा प्रहरी कमाण्ड सम्हाल्नेछन्।
प्रहरी सेवामा प्रवेशदेखि नेतृत्वसम्म
कार्कीले १८ चैत २०५४ मा प्रहरी निरीक्षकका रूपमा सेवा आरम्भ गरेका थिए।
उनी विद्यमान ३० वर्षे सेवा अवधिअनुसार करिब साढे दुई वर्षसम्म प्रहरी संगठनको नेतृत्व गर्नेछन्।
उनको कार्यकाल १७ चैत २०८४ सम्म रहनेछ।
संगठनभित्र उनलाई इमान्दार, व्यावसायिक र कुनै आर्थिक विवादमा नमुछिएका अधिकृतका रूपमा चिनिन्छ।
व्यक्तिगत पृष्ठभूमि र शैक्षिक योग्यता
गुल्मी जिल्लाको मालिका गाउँपालिका–७, घमिरमा २०२९ साल साउन १५ गते जन्मिएका कार्कीले राजनीतिशास्त्रमा स्नातकोत्तर तथा मानविकी, शिक्षाशास्त्र र कानुनमा स्नातक गरेका छन्।
२८ वर्षको सेवायात्रामा उनले फिल्ड कमाण्डदेखि नीतिगत तहसम्मको गहिरो अनुभव हासिल गरेका छन्।
व्यावसायिक यात्रा
कार्कीको करियर विविध र चुनौतीपूर्ण जिम्मेवारीले भरिएको छ। महानिरीक्षक नियुक्त हुनुअघि उनले काठमाडौं उपत्यका प्रहरी कार्यालयका प्रमुखका रूपमा काम गरेका थिए।
भदौ २४ गतेको जेन–जी आन्दोलनका समयमा उनले उपत्यकाको सुरक्षा संयन्त्रलाई कुशलतापूर्वक नेतृत्व दिएका थिए।
एसएसपीका रूपमा रहँदा उनले काठमाडौं जिल्ला प्रहरी परिसरको कमाण्ड सम्हालेका थिए, जहाँ भुटानी शरणार्थी प्रकरण जस्तो राष्ट्रिय चर्चाको मुद्दाको अनुसन्धान अघि बढेको थियो।
डीआइजीका रूपमा उनले लुम्बिनी प्रदेश प्रहरी कार्यालयको नेतृत्व गरेका थिए।
त्यसअघि उनले लागुऔषध नियन्त्रण ब्यूरो, विशेष ब्यूरो, महानगरीय ट्राफिक प्रहरी महाशाखा, इन्टरपोल शाखा, अख्तियार दुरुपयोग अनुसन्धान आयोग र प्रहरी महानिरीक्षकको सचिवालयमा समेत महत्वपूर्ण जिम्मेवारी सम्हालेका थिए।
उनी एक समय नेपाल प्रहरीका केन्द्रीय प्रवक्ता पनि रहेका थिए।
अन्तर्राष्ट्रिय अनुभव र सम्मान
कार्कीले संयुक्त राष्ट्रसंघको शान्ति मिसनअन्तर्गत पूर्वी टिमोरमा दुई पटक गरी तीन वर्ष र हाइटीमा १८ महिना सेवा गरेका छन्।
उनी नेपाल सरकारले प्रदान गरेको ‘प्रबल जनसेवा श्री’ विभूषणबाट सम्मानित भएका छन्।
त्यसका साथै, उनले संयुक्त राष्ट्रसंघ पदक तथा १४ पटक नगद पुरस्कार पनि प्राप्त गरेका छन्।
नेतृत्वप्रति जनअपेक्षा
फिल्ड कमाण्ड, अपराध अनुसन्धान, नीतिगत व्यवस्थापन र अन्तर्राष्ट्रिय अनुभवको सन्तुलित मिश्रण भएका कार्कीको नेतृत्वमा नेपाल प्रहरीले शान्ति, सुरक्षा र अपराध नियन्त्रणमा नयाँ मानक स्थापना गर्ने जनअपेक्षा गरिएको छ।
पदोन्नतिक्रम
- प्रहरी निरीक्षक — १८ चैत २०५४
- प्रहरी नायब उपरीक्षक (डीएसपी) — मंसिर २६, २०६६
- प्रहरी उपरीक्षक (एसपी) — साउन १९, २०७४
- प्रहरी वरिष्ठ उपरीक्षक (एसएसपी) — साउन ३, २०७९
- प्रहरी नायब महानिरीक्षक (डीआइजी) — जेठ १३, २०८१
- प्रहरी अतिरिक्त महानिरीक्षक (एआइजी) — वैशाख ११, २०८२
प्रत्येक चरणको योगदान
डीएसपी हुँदा उनले बानेश्वर क्षेत्रका प्रमुखका रूपमा शान्ति–सुरक्षामा उल्लेखनीय सफलता देखाए।
एसपीका रूपमा कपिलवस्तु र कास्कीमा अपराध नियन्त्रण र सामुदायिक प्रहरी प्रणालीमा नयाँ दृष्टिकोण ल्याए।
एसएसपीका रूपमा काठमाडौं प्रहरी प्रमुख हुँदा राजधानीको सुरक्षा सञ्जाललाई प्रविधिमुखी र जनकेन्द्रित बनाए।
डीआइजी हुँदा केन्द्रीय प्रवक्ताका रूपमा उनले प्रहरीका जनसरोकारका विषयहरू तथ्यगत, पारदर्शी र जिम्मेवार ढङ्गले सञ्चार माध्यममा प्रस्तुत गरे।
लुम्बिनी प्रदेश प्रहरी प्रमुखका रूपमा उनले संगठनलाई अनुशासन, दक्षता र जवाफदेहिताको दिशामा उचाइमा पुर्याए।
प्रेरणादायी नेतृत्व र मनोबल अभिवृद्धि
जेन–जी आन्दोलनपछि प्रहरीको मनोबल खस्किएको बेला, एआइजी कार्कीले संगठनभित्र आत्मविश्वास र प्रेरणाको वातावरण पुनःस्थापना गरेका थिए।
उनले प्रशिक्षण, समन्वय र मनोबल अभिवृद्धि कार्यक्रमहरूलाई प्राथमिकता दिँदै प्रहरीका उपलब्धि र योगदानलाई सार्वजनिक रूपमा प्रोत्साहन गरे।
उनको नेतृत्वमा भएका यी कदमहरूले केवल संगठनभित्र सकारात्मक वातावरण निर्माण गरेका छैनन्,
जनता र प्रहरीबीचको विश्वासको सम्बन्ध पनि बलियो बनाएका छन् — जसले प्रहरी सेवाको कार्यकुशलता र समर्पणमा उल्लेखनीय वृद्धि गरेको छ।
प्रतिक्रिया
सम्बन्धित खवर
