रौतहट, मंसिर १४ गते। नेपाल सरकारले ‘लैंगिक हिंसा विरुद्ध १६ दिने अभियान’को अवसरमा उत्कृष्ट सेवा, समर्पण र प्रभावकारी भूमिकाका आधारमा जिल्ला प्रहरी कार्यालय रौतहटमा कार्यरत प्र.स.नि. रागनी कुमारीलाई देशभरिका महिला, बालबालिका तथा ज्येष्ठ नागरिक सेवा केन्द्रहरूमध्ये प्रथम स्थान हासिल गर्दै प्रतिष्ठित प्रशंसा–पत्र प्रदान गरेको छ।
गृह मन्त्रालय तथा नेपाल प्रहरी प्रधान कार्यालयमार्फत प्रदान गरिएको प्रशंसा–पत्रमा कुमारीले विभागीय नीति, निर्देशन र आदेशको पूर्ण पालना गर्दै आफ्नो जिम्मेवारी अत्यन्त व्यावसायिक, संवेदनशील र प्रभावकारी ढङ्गले सम्पादन गरेको उल्लेख छ। विशेषगरी लैंगिक हिंसा न्यूनीकरण, पीडितमैत्री सेवा प्रवाह तथा लैंगिक उत्तरदायी प्रहरी सेवा सुदृढीकरणमा उनले देखाएको नेतृत्व, सक्रियता र प्रेरणादायी भूमिकालाई उच्च सम्मान गरिएको हो।
देशभरिका सेवा केन्द्रहरूमा कार्यरत प्रहरी कर्मचारीहरूमध्ये उत्कृष्ट कार्यसम्पादनका आधारमा छनौट भएकी प्र.स.नि. कुमारीलाई प्रशंसा–पत्रसहित ४० हजार रुपैयाँ नगद पुरस्कार नेपाल प्रहरी महानिरीक्षक दान बहादुर कार्कीले प्रदान गरे।
उक्त कार्यक्रममा महानिरीक्षक कार्कीले कुमारीलाई “सर्वोत्कृष्ट प्रहरी” घोषित गर्दै निरन्तर सफलताको शुभकामना व्यक्त गरे।
आर्थिक वर्ष २०७८/८२ को लैंगिक हिंसा सम्बन्धी तथ्यपत्र सार्वजनिक कार्यक्रममा महिला, बालबालिका तथा ज्येष्ठ नागरिक सेवा केन्द्रमा कार्यरत प्रहरी कर्मचारीहरूमध्ये उत्कृष्ट कार्यसम्पादनका आधारमा कुमारीसहितका नाम उत्कृष्ट प्रहरी कर्मचारी छनौट समितिद्वारा चयन गरिएको हो।
प्रतिक्रिया
सम्बन्धित खवर
