विराटनगर, मंसिर ११। कोशी प्रदेश प्रहरी प्रमुखको रूपमा प्रहरी नायव महानिरीक्षक (डीआईजी) बिनोद घिमिरेले आज औपचारिक रूपमा पदभार ग्रहण गरेका छन्। गृह मन्त्रालयको मंसिर ८ गतेको निर्णयअनुसार सरुवा भई विराटनगरस्थित प्रदेश प्रहरी कार्यालयमा हाजिर भएका घिमिरेले मंसिर ११ गतेदेखि कार्यभार सम्हालेका हुन्।

पदभार ग्रहण समारोहमा प्रदेश प्रहरी तालिम केन्द्रका समादेशक वरिष्ठ उपरीक्षक (एसएसपी) गोबिन्द अधिकारी, प्रदेश प्रहरी कार्यालय विराटनगरका एसएसपी दिपक पोखरेल, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी, कोशी प्रदेश प्रहरी गण रानी तथा जिल्ला प्रहरी कार्यालय सुनसरीका प्रहरी प्रमुखसहितका अधिकृतहरूले घिमिरेलाई स्वागत गरेका थिए।

कार्यभार सम्हालेपछि आयोजना गरिएको भेलामा उपस्थित प्रहरी अधिकृत तथा कर्मचारीहरूका साथै भर्चुअल माध्यमबाट जडान भएका जिल्ला प्रहरी प्रमुख र मुद्धा चल्ने इकाईका प्रमुखहरूलाई सम्बोधन गर्दै डीआईजी घिमिरेले विषम परिस्थिति आए पनि अग्रपंक्तिमा रहेर उच्च मनोबलका साथ अपराध नियन्त्रण र शान्ति–सुरक्षा कायम गर्न निर्देशन दिए।

उनले ७० वर्षको इतिहास बोकेको नेपाल प्रहरी संगठनले आरोह–अवरोहबीच पनि कानून कार्यान्वयन र जनसेवामा निरन्तर समर्पित रहँदै आएको उल्लेख गरे।

“राज्यको उपस्थिति नै प्रहरी हो, प्रहरीविनाको समाज अकल्पनीय हुन्छ,” भन्दै उनले परिस्थितिअनुसार आत्मसुधार, सामूहिक भावना, सहकार्य, समन्वय र प्रविधिको प्रभावकारी प्रयोगमार्फत संगठनको गरिमा सदैव उच्च राख्न सबैलाई आग्रह गरे।

डीआईजी घिमिरेले राम्रो काम गर्ने प्रहरीलाई तत्काल पुरस्कृत गर्न र कानूनविपरीत काम गर्नेप्रति कडाइका साथ कारबाही गर्न समेत निर्देशन दिएका छन्।