काठमाडौं —मधेश प्रदेशसभा सदस्य सरोजकुमार सिंह भ्रष्टाचार आरोपमा अख्तियार दुरुपयोग अनुसन्धान आयोगको टोलीद्वारा अनामनगरबाट पक्राउ परेका छन्। सिंह जनता समाजवादी पार्टी (जसपा) का सांसद हुन्।

प्रदेश सांसद विकास कोषको रकम उपभोक्ता समितिमार्फत हिनामिना गरी निजी खातामा राखेको अभियोगमा उनलाई नियन्त्रणमा लिएको अख्तियारले जनाएको छ। उनले विकास कोषको रकम विभिन्न उपभोक्ता समिति गठन गरी ती समितिका नाममा जम्मा गराएको देखाएर, आफ्ना स्वकीय सचिव विनोदकुमार लाल कायस्थमार्फत रकम झिकाई आफू र पत्नीको खातामा राखेका थिए।

यसअघि केही दिनअघि मात्र अख्तियारको टोलीले सचिव कायस्थलाई समेत पक्राउ गरेको थियो। सो क्रममा सांसद सिंहले प्रयोग गर्दै आएको विद्युतीय उपकरणहरू पनि प्रहरीले नियन्त्रणमा लिएको थियो।

अख्तियारले जनप्रतिनिधिमार्फत हुने विकास योजनामा पारदर्शिता र जवाफदेहिता कायम गर्नुपर्नेमा जोड दिँदै, यस्ता अनियमितताविरुद्ध कडा कारबाही अघि बढाइने जनाएको छ। सिंहविरुद्ध थप अनुसन्धान भइरहेको छ।