कैलाली— नेकपा (एमाले) का प्रभावशाली नेता नर बहादुर खड्काको स्वागतका लागि कैलाली क्षेत्र नम्बर २ अन्तर्गत पर्ने चिसापानी क्षेत्रमा युवाहरूको उल्लेखनीय सहभागिता देखिएको छ। आगामी स्थानीय तह निर्वाचनलाई लक्षित गर्दै लम्कीचुहा नगरपालिकाको मेयर पदका लागि तयारीमा रहनुभएका खड्कालाई “हामी सबै तपाईंको साथमा छौँ” भन्ने नारासहित Gen Z तथा युवा समूहले भव्य रूपमा स्वागत गरेका हुन्।

एमालेको राजनीतिमा लामो समयदेखि सक्रिय रहँदै आउनुभएका खड्का संगठन निर्माण, जनसम्पर्क र स्थानीय विकासका मुद्दामा परिचित नेता मानिन्छन्। उनको सम्भावित उम्मेदवारीलाई लिएर क्षेत्रका युवाहरूमा उत्साह बढ्दै गएको देखिन्छ, जसको प्रत्यक्ष झल्को चिसापानीमा आयोजित स्वागत कार्यक्रममा देखिएको थियो।

स्वागतका क्रममा युवाहरूले स्कुटिङ (र्‍याली) आयोजना गर्दै खड्कालाई कार्यक्रम स्थलसम्म पुर्‍याएका थिए। र्‍यालीमा सहभागी युवाहरूले पार्टीका झण्डा, नारा र सन्देशमूलक प्लेकार्डसहित उत्साहपूर्ण उपस्थिति जनाएका थिए। जोश, एकता र परिवर्तनको अपेक्षाले भरिएको उक्त र्‍यालीले स्थानीय राजनीतिक वातावरणलाई थप तातो बनाएको छ।

कार्यक्रममा सहभागी युवाहरूले खड्काको नेतृत्वप्रति भरोसा व्यक्त गर्दै स्थानीय विकास, सुशासन र युवामैत्री नीतिमा केन्द्रित नेतृत्व आवश्यक भएको धारणा राखेका थिए। उनीहरूले लम्कीचुहा नगरपालिकाको समग्र विकासका लागि अनुभवी र जनआधारित नेतृत्वको आवश्यकता औँल्याउँदै खड्काको उम्मेदवारीलाई समर्थन जनाए।

स्वागत कार्यक्रममा बोल्दै खड्काले युवाहरूको सक्रिय सहभागिताले आफूलाई थप जिम्मेवार बनाएको उल्लेख गरे। उनले युवाको ऊर्जा, सोच र सहभागिताबिनाको राजनीति अपूरो हुने भन्दै आगामी दिनमा युवासँगै अघि बढेर लम्कीचुहाको विकास र समृद्धिका लागि काम गर्ने प्रतिबद्धता व्यक्त गरे।

खड्काको स्वागतमा देखिएको युवाहरूको उत्साहले लम्कीचुहा नगरपालिकाको मेयर प्रतिस्पर्धा रोचक बन्दै जाने संकेत गरेको छ। स्थानीय तहको राजनीतिमा युवाको बढ्दो चासो र सक्रियताले आगामी चुनावी समीकरणलाई समेत प्रभाव पार्ने देखिएको छ।