काठमाण्डौं— नेपाल प्रहरीको आधिकारिक फेसबुक पेजबाट हालै ‘प्रहरीमा नयाँ भर्ना सम्बन्धी सूचना’ भन्दै एक भिडियो सार्वजनिक गरियो। तर, सो पोस्टमा गरिएको कमेन्टहरू हेर्दा एक गम्भीर सामाजिक संकेत देखिन्छ। हाम्रो अनुमानमा, कमेन्ट गर्ने सय युवामध्ये करिब ९० प्रतिशतले नकारात्मक प्रतिक्रिया दिएका छन्—“भर्ती त हुने होइन”, “पहिल्यै सेटिङ मिलिसकेको होला”, “योग्यता हेर्दैन, पहुँच चाहिन्छ” जस्ता शब्दहरूमा उनीहरूको निराशा झल्किएको छ।

प्रश्न उठ्छ—किन यति खिन्न छन् नेपाली युवा? किन राज्यका सुरक्षासंस्थाप्रति उनीहरूको विश्वास घट्दो क्रममा छ?

यसको मुख्य कारण हो—वर्षौंदेखि जरा गाडेर बसेको असमानता, पहुँचको खेल र पारदर्शिताको अभाव। योग्य, सक्षम र इच्छाशक्ति भएका धेरै युवाहरूले यस्ता भर्ना प्रक्रियामा पटकपटक असफलता भोगेका छन्, जुन उनीहरूको योग्यताभन्दा होइन, प्रणालीको कमजोरीका कारण भएको देखिन्छ। जब मेहनती युवाले आफ्नै देशको प्रणालीप्रति विश्वास गुमाउँछ, तब त्यो समाजका लागि ठूलो चिन्ताको विषय बन्न जान्छ।

अब प्रश्न उठ्छ—यसबाट आउनसक्ने चुनौती के हुन सक्छ?

१. प्रवासी मनोवृत्ति: देशमा अवसर नदेखेर विदेश पलायनको गति अझ तीव्र हुन सक्छ।

२. अपराधको जोखिम: निराश र अवसरबाट वञ्चित युवा अपराध, लागूपदार्थ वा अन्य गलत बाटोमा लाग्ने सम्भावना बढ्छ।

३. प्रशासनप्रतिको अविश्वास: सुरक्षा निकायप्रतिको जनविश्वास कमजोर हुँदा कानुनी शासनको कार्यान्वयनमै असर पर्न सक्छ।

यस परिस्थितिलाई गम्भीरतापूर्वक नलिए यसको प्रभाव दीर्घकालीन हुनसक्छ। राज्य, सुरक्षा निकाय, तथा नीति निर्माण गर्ने सबै तहका जिम्मेवार पक्षले यसप्रति गम्भीर आत्मसमीक्षा गर्न आवश्यक छ। केवल सूचना जारी गर्नु मात्रै होइन—भर्ना प्रक्रिया पारदर्शी, निष्पक्ष र योग्यता आधारित हुनुपर्छ भन्ने विश्वास युवामा फर्काउनु अहिलेको आवश्यकता हो।