काठमाण्डौं— बाँके जिल्लाको कोहलपुरमा प्रहरीले विशेष सूचनाका आधारमा खैरो हेरोइनसहित तीन जनालाई पक्राउ गरेको छ। नेपालगन्जस्थित लागुऔषध नियन्त्रण ब्यूरो र इलाका प्रहरी कार्यालय कोहलपुरको संयुक्त टोलीले शनिबार राति कोहलपुर नगरपालिका–२ विकासनगरका २६ वर्षीय टीकाराम सुनार, कोहलपुर–११ की २० वर्षीया सपना सिंह ठकुरी, र कोहलपुर–२ आनन्दनगरका २७ वर्षीय चित्रबहादुर थापालाई नियन्त्रणमा लिएको हो।

प्रहरीका अनुसार टीकाराम र सपनालाई ६ सय मिलिग्राम खैरो हेरोइनसहित पक्राउ गरिएको छ। उनीहरू सँगै रहेको अवस्थामा टीकारामको गोजीबाट उक्त लागुऔषध बरामद गरिएको हो। त्यस्तै, चित्रबहादुरलाई कोहलपुर–२ सालको बुटाबाट २ ग्राम ४८ मिलिग्राम खैरो हेरोइनसहित पक्राउ गरिएको छ।

पक्राउ परेका तीनै जनालाई हिरासतमा राखी इलाका प्रहरी कार्यालय कोहलपुरले थप अनुसन्धान सुरु गरेको जिल्ला प्रहरी कार्यालय बाँकेले जनाएको छ।