विराटनगर, मंसिर १४ गते। कोशी प्रदेश प्रहरी प्रमुख प्रहरी नायब महानिरीक्षक बिनोद घिमिरेले भर्चुअल माध्यममार्फत प्रदेशअन्तर्गतका जिल्ला प्रहरी प्रमुखहरूलाई सुरक्षा व्यवस्थासम्बन्धी आवश्यक निर्देशन दिएका छन्।

निर्देशन क्रममा उनले जिल्लाहरूको शान्ति–सुरक्षालाई प्रभावकारी बनाउन सम्भावित सुरक्षा चुनौतीहरूको अध्ययन गरी उचित रूपमा प्रहरी परिचालन गर्न सुझाव दिए। खुला सिमानाका कारण हुन सक्ने आपराधिक गतिविधि, फरार प्रतिवादी पक्राउ, अवैध हातहतियार नियन्त्रण, लागुऔषधको कारोबार तथा ओसारपसार, चोरी–तस्करीजस्ता घटनामा कडाइका साथ नियन्त्रण गर्दै चेकजाँच प्रणालीलाई थप प्रभावकारी बनाउन निर्देशन गरे।

प्रहरी प्रमुख घिमिरेले मातहत प्रहरी कार्यालयहरूको नियमित अनुगमन–निरीक्षण गर्न, कार्यरत प्रहरी कर्मचारीहरूको पिरमर्का र समस्याको सुनुवाइ गर्दै आवश्यक निर्देशन दिन पनि जिल्ला प्रमुखहरूलाई ध्यानाकर्षण गराए।

आगामी निर्वाचनलाई सुरक्षित र भयरहित वातावरणमा सम्पन्न गराउन अन्य सुरक्षा निकाय, राजनीतिक दल तथा स्थानीय समुदायसँग समन्वय र सहकार्यलाई अझ मजबुत बनाउनुपर्ने उनले स्पष्ट पारे।

त्यसैगरी, प्रहरी पोशाक दुरुस्त रूपमा प्रयोग गर्ने, कार्यालयको सुन्दरता र अनुशासनमा विशेष ध्यान दिने तथा विभागीय नीति–निर्देशनको अक्षरशः पालना गर्दै आफ्नो जिम्मेवारी त्रुटिरहित ढंगले निर्वाह गर्न पनि उनले निर्देशन दिएका छन्।