काठमाण्डौं— काठमाडौँको नयाँबजार र ढल्कु क्षेत्रमा फोहोर संकलन गर्दै आएका होमबहादुर खड्का (विक्रम भुजेल) र दीपक भुजेल जेनजी आन्दोलनको भीडसँग मिसिएपछि अहिले कारागार पुगेका छन्। भदौ २४ मा लैनचौरस्थित प्रहरी वृत्तमा भएको आगजनी र लुटपाट घटनामा संलग्नता देखिएपछि उनीहरू प्रहरी अनुसन्धानको दायरामा तानिएका हुन्।

घटनाको दिन उनीहरू बिहानझैँ फोहोर संकलन गर्दै थिए। ढल्कु प्रहरी बिट अगाडि ठूलो भीड नारा लगाइरहेको देखेपछि उनीहरू पनि आन्दोलनकारीसँगै अघि बढे। भदौ २३ मा प्रहरी गोलीकाण्डमा १९ जनाको मृत्यु भएपछि उग्र बनेको भीडसँगै विक्रम र दीपक पकनाजोल–कालधारा हुँदै लैनचौर प्रहरी वृत्ततर्फ पुगे।

लैनचौर पुग्नै लाग्दा एक व्यक्तिसँग पेट्रोल भएको देखेपछि उनीहरूले पेट्रोल मागे। ‘चौकी जलाउँछौँ’ भन्दै उनीहरू प्रहरी वृत्तमा प्रवेश गरे। त्यतिबेला कार्यालयको शिशा पहिल्यै फुटिसकेको थियो र प्रहरी ज्यान जोगाउँदै बाहिर निस्किरहेका थिए। त्यसपछि विक्रम र दीपकले पार्किङमा रहेको सरकारी गाडी बाहिर निकालेर पेट्रोल छर्की आगो लगाइदिए। अन्य आन्दोलनकारीहरूले पनि मोटरसाइकल, स्कूटर र कार्यालयका सामग्रीमा पेट्रोल छर्केर आगजनी गरेका थिए।

विक्रम र दीपकका बयानका आधारमा प्रहरीले जीतेन्द्र हमाल, सागर थापा मगर, समीर श्रेष्ठ र पेम्बा शेर्पा ‘कार्लोस’लाई पनि पक्राउ गर्‍यो। कार्लोस बाहेक सबैले आगजनी तथा तोडफोडमा संलग्नता स्वीकार गरेका छन्। तर समीर र कार्लोसले भने थुनुवा सामान राख्ने लकर फोरेर सुनका गहना, घडी र मोबाइल चोरी गरेको अनुसन्धानले देखाएको छ।

प्रहरीले कात्तिक १४ मा विक्रम र दीपकलाई र कात्तिक २१ मा जीतेन्द्रलाई पक्राउ गर्‍यो। घटनाका क्रममा लैनचौर वृत्तका असई दिनेश परियारको बुलेट मोटरसाइकल आगजनी भएको थियो। परियारले ७३ हजार ९१३ रुपैयाँ क्षतिपूर्तिको माग गरेका छन्। असई लक्ष्मीकुमारी तिवारीले आफ्नो स्कूटर पूर्ण रूपमा जलेपछि डेढ लाख क्षतिपूर्ति दाबी गरेकी छन्।

प्रहरी वृत्त लैनचौरले कार्यालय, स्टाफ र थुनुवा सामानसहित कूल २४ लाख ९३ हजार ८५८ रुपैयाँ क्षति भएको दाबी गर्दै पक्राउ परेकासँगै क्षतिपूर्तिको दाबी अघि बढाएको छ। ट्राफिक प्रहरी वृत्त सोह्रखुट्टेले पनि ३ लाख ८७ हजार रुपैयाँ क्षतिपूर्ति माग गरेको छ। जलाइएका तीनवटा भ्यान र लुटिएका गहनाको क्षति पनि मुद्दामा समावेश गरिएको छ।

जिल्ला प्रहरी परिसर काठमाडौँका प्रवक्ता एसपी पवनकुमार भट्टराईका अनुसार सीसीटीभी फुटेज र बयानहरूले उनीहरूको संलग्नता स्पष्ट देखाउँछन्। उनका अनुसार सरकारी वकिल कार्यालयले मुद्दा दर्ता गरी थुनछेक बहस सम्पन्न भइसकेको र सबै अभियुक्त पुर्पक्षका लागि कारागार पठाइएका छन्।

प्रहरीका अनुसार सरकारी सम्पत्ति नष्ट गर्ने घटनामा संलग्न व्यक्तिहरूबाटै क्षतिपूर्ति उठाउने गरी कानुनी प्रक्रिया अघि बढाइएको छ।