काठमाडौं । नेपाल प्रहरीका महानिरीक्षक (आईजीपी) दानबहादुर कार्की यूनिफर्ममै सामान्य चियापसल पुगेको दृश्य अहिले सामाजिक सञ्चालमा चर्चाको विषय बनेको छ। संकमुलस्थित ‘चियादानी’ नामक चियापसलमा शुक्रबार पुगेर कार्कीले चिया पिएको फोटो सार्वजनिक भएपछि उनको यो व्यवहारलाई धेरैले सकारात्मक उदाहरणका रूपमा लिएका छन्।

उक्त चियापसलमा यसअघि पूर्वराष्ट्रपति बिद्यादेवी भण्डारीसहित उच्च पदस्थ व्यक्तिहरू पुगिरहेको भए पनि प्रहरीको सर्वोच्च पदाधिकारी आईजीपी कार्कीको आगमनले विशेष ध्यान आकर्षित गरेको छ। चियापसलका सञ्चालक केपी खनाल २३ भदौको जेनजी आन्दोलनका एक अगुवामध्ये मानिन्छन् र काठमाडौं महानगरका मेयर बालेन शाहको निकट समूहमा समेत हुन्।

उच्च पदस्थहरूलाई बोलाएर आफ्नो व्यवसायलाई चर्चामा ल्याउने खनालको शैलीको बीचमा आईजीपी कार्कीको उपस्थितिलाई भने भिन्न अर्थमा लिइएको छ। समुदायसँग प्रत्यक्ष रूपमा घुलमिल हुने, जनतासँग नजिकिन चाहने प्रहरी प्रमुखको सहज र व्यवहारिक शैलीको रूपमा धेरैले यस कदमको प्रशंसा गरेका छन्।

समुदाय–प्रहरी सम्बन्ध सुधारका लागि नेतृत्व तहबाट यस्तो सरल व्यवहारले सकारात्मक सन्देश जाने र प्रहरी संगठनप्रति जनविश्वास अझै बलियो हुने सुरक्षा विश्लेषकहरूको भनाइ छ। आईजीपी कार्कीले कार्यालयको कठोर वातावरणभन्दा बाहिर जनजीवन नजिकबाट अवलोकन गर्ने, सहज रूपमा संवाद स्थापना गर्ने क्षमता राखेको यो कदमले पुनः प्रमाणित गरेको छ।