मेचीनगर । झापाको मेचीनगर -६ स्थित काँकडभिट्टा नाकाबाट भारतीय नम्बर प्लेटका तीनवटा कार र तस्करीको सामानसहित तीनजना चालकलाई प्रहरीले नियन्त्रणमा लिएको छ। भारतीय कार प्रयोग गरी अवैध रुपमा भन्सार छलेर लत्ताकपडा भित्र्याएको सुराकी पाएको जिल्ला प्रहरी कार्यालय झापा र इलाका प्रहरी कार्यालय काकडभिट्टाको टोलीले घटनामा संलग्नलाई सामानसहित पक्राउ गरेको हो।
कपडा तस्करहरूले कारको पछाडि भागको ब्याक लाइट हुने दुवै ठाउँमा दुलो बनाई त्यसभित्र लत्ताकपडा हालेर सोजै भन्सार अगाडिबाटै सरसामान लैजाने गरेको नयाँ तथ्य खुलेको छ। तीन वटा भारतीय नम्बर प्लेट भएको कार नियन्त्रणमा लिएसँगै सो तस्करीको नयाँ शैली पत्ता लागेको हो ।
नयाँ मेची पुलबाट सोजै भन्सार अगाडिबाट नेपाल भित्रिने ती कारहरूलाई सीमामा तैनाथ सुरक्षाकर्मी र भन्सार कर्मचारीले रोकेर चेकजाँच गर्दा खाली भएर त्यतिकै छाडिदिने गरेका थिए।
कारभित्रको सिट, सिटमुनि र डिक्कीमा सरसामान नभएर छाडिएका ती कारहरूलाई शनिबार दिउँसो साढे ४ बजेको समयमा विशेष सूचनाको आधारमा जिल्ला प्रहरी कार्यालय झापाबाट खटेको प्रहरी टोलीले इप्रका काकडभिट्टाको सहयोगमा नियन्त्रणमा लिएर चेकजाँच गर्दा विभिन्न ब्रान्डका लत्ताकपडा बरामद गरेको जिल्ला प्रहरी कार्यालय झापाका प्रवक्ता डीएसपी कृष्णकुमार चन्दले जानकारी दिए ।
तस्कर समूहले नयाँ शैली अपनाएर कारको पछाडि भागको ब्याक लाइट हुने ठाउँ दुलो बनाएर त्यहाँभित्र लत्ताकपडा राखेर नेपाल सरसामान भित्राउँदै आइरहेको थियो । यसबारेमा सीमामा तैनाथ सुरक्षाकर्मीले सुइँको समेत पाएका थिएनन् ।
प्रहरी टोलीले मेचीनगर नगरपालिका ६ स्थित भन्सार गेट पछाडि भारतबाट नेपालतर्फ आउँदै गरेको डब्लुबी ७४ एन ६८७८, डब्लुबी ७४ पी ७७९९ र डब्लुबी ७४ एन ८५६२ नम्बरको भारतीय कारसहित तीन जना चालकलाई अवैध सामानसहित नियन्त्रणमा लिन सफल भएको हो ।
ती कारहरू भित्र लुकाइछिपाई ल्याएको अन्दाजी ३ लाख ९९ हजार एक सय रुपैयाँ बराबरको पुरुष ट्राउजर ११० पिस, लेडिज ट्राउजर ४२ पिस, रुमाल १२५० पिस, लेडिज सर्ट २२ पिस, कुर्था ३२ पिस, भेष्ट ५३ पिस , लेडिज ब्रा ५२८ पिस, लेडिज भेष्ट १८ पिस, कुर्थी १० पिस र लेडिज सर्ट १७ पिस फेला परेको थियो ।
ती सामानहरूसहित अन्दाजी २४ लाख बराबरको तीन वटा कार र त्यसका चालकहरू भारत पश्चिम बङ्गाल दार्जिलिङ जिल्ला पानीट्याङकी बस्ने ४२ वर्षीय रामदयाल बर्मन, सोही ठाउँका ३३ वर्षीय अमित राय र ४६ वर्षीय राजकुमार घोषलाई नियन्त्रणमा लिएको प्रवक्ता चन्दले बताए ।
त्यस्तै शनिबार साँझ ७ बजे मेचीनगर नगरपालिका ६ मेची पुलमा भारततर्फ अवैध रुपमा भन्सार छलेर लुकाइछिपाई लाँदै गरेको सिल्क एन्ड साइन क्रिम १२१ पिस र विभिन्न किसिमका किराना सामान गरी अन्दाजी एक लाख ५१ हजार बराबरको सामान बरामद गरी आवश्यक कारबाहीका लागि मेची भन्सार कार्यालय काँकडभिट्टामा बुझाइ
सकेको प्रहरीले जनाएको छ ।
