कैलाली । कैलालीमा १६ वर्षदेखि फरार रहेका सवारी ज्यान मुद्दाका प्रतिवादीलाई प्रहरीले पक्राउ गरेको छ। इलाका प्रहरी कार्यालय मालाखेतीका अनुसार पक्राउ पर्नेमा गोदावरी नगरपालिका–१० ओलानी बस्ने ४० वर्षीय रामलाल चौधरी रहेका छन्।
प्रहरीका अनुसार २०६६ साल मंसिर ६ गते चौधरीले चलाएको ट्याक्टर गोदावरी–२ तेघरी क्षेत्रमा दुर्घटनाग्रस्त हुँदा ४ जना घाइते भएका थिए। तीमध्ये एकजनाको उपचारका क्रममा मृत्यु भएको थियो। उक्त घटनापछिका दिनदेखि चौधरी फरार रहेका थिए।
वर्षौंदेखि लुकेर बसेका उनलाई खोजतलासका क्रममा शुक्रबार पक्राउ गर्न मालाखेतीबाट खटिएको टोली सफल भएको प्रहरी निरीक्षक तथा सूचना अधिकारी पुस्कर पन्तले जानकारी दिए। उनका अनुसार चौधरीमाथि आवश्यक थप अनुसन्धान भइरहेको छ।
