काठमाडौं । काठमाडौंका विभिन्न क्षेत्रमा धारिलो हतियार (चक्कु) देखाइ लुटपाट गर्दै आएका दुई युवकलाई प्रहरीले पक्राउ गरेको छ। जिल्ला प्रहरी परिसर काठमाडौंका सूचना अधिकारी, प्रहरी उपरीक्षक पवनकुमार भट्टराईका अनुसार दिउँसो तथा राति सक्रिय रूपमा लुटपाटमा संलग्न २० वर्षीय अमृत तामाङ र २६ वर्षीय सागर घिसिङलाई नियन्त्रणमा लिइएको हो।
उनीहरूलाई २०८२ मङ्सिर ११ गते काठमाडौं महानगरपालिका–२६ स्थित सडकखण्डबाट लुटपाटमा प्रयोग गरिएको बा ६५ प २४१२ नम्बरको पल्सर मोटरसाइकलसहित पक्राउ गरिएको थियो। सोधपुछमा दुवैले विभिन्न स्थानबाट चोरी तथा लुटपाट गरी प्राप्त धनमाल पशुपति प्रजापतिलाई बिक्री गरेको बयान दिएका छन्।
पक्राउ परेका तामाङको स्थायी घर उदयपुर, मुकुर्ची हुन्छ भने हाल काठमाडौं बुढानिलकण्ठ बस्दै आएका थिए। घिसिङ रामेछाप फुलासी स्थायी घर भएका हुन्। त्यस्तै, चोरी–लुटपाट गरिएको सामान सेवन गर्ने प्रजापति सुनसरी, इनरुवा–२ स्थायी घर भइ बुढानिलकण्ठ बस्दै आएका थिए।
उनीहरूले मङ्सिर ११ गते काठमाडौं महानगरपालिका–२६ ज्याठा रोडमा एक महिलाको सिक्री लुटेर फरार भएका थिए। सोही दिन महानगरपालिका–१६ सरस्वती क्याम्पस अगाडि एक पैदलयात्री पुरुषको सामसुङ मोबाइल र नगद चार हजार रुपैयाँ लुटेको खुलेको छ।
यसअघि मङ्सिर ८ गते पक्नाजोल क्षेत्रबाट एक पुरुषको आइफोन मोबाइल, सोही दिन सोह्रखुट्टे नजिकै अर्को पैदलयात्रीको मोबाइल, पर्स, नगद सात हजार रुपैयाँ र दुई बैंकका एटीएम कार्ड लुटिएको थियो। त्यस्तै, मङ्सिर ३ गते नयाँबजार क्षेत्रबाट २४ हजार रुपैयाँ तथा म्हैपीस्थित सडकखण्डबाट एक पुरुषको मोबाइल र दुई थान चाँदीको सिक्री लुटिएको घटना समेत उनीहरूसँग जोडिएको छ।
प्रहरीले उनीहरूबाट बा ६५ प २४१२ नम्बरको पल्सर मोटरसाइकल, विभिन्न कम्पनीका ३२ थान मोबाइल, सुनझैं देखिने सिक्री एक थान, नगद ६ हजार ४९५ रुपैयाँ र धारिलो हतियार चक्कु एक थान बरामद गरेको जनाएको छ। उनीहरूविरुद्ध थप अनुसन्धान जारी रहेको जिल्ला प्रहरी परिसर काठमाण्डौंको भनाइ छ।
