काठमाडौं । भदौ २४ गते काठमाडौंका विभिन्न प्रहरी कार्यालयबाट लुटिएका पेस्तोलसहित तीन जना पक्राउ परेका छन्। काठमाडौं उपत्यका प्रहरी कार्यालय रानीपोखरीबाट खटिएको टोलीले दुई वटा पेस्तोल र एउटा म्यागजिनसहित तीन जनालाई नियन्त्रणमा लिएको हो।

पक्राउ पर्नेमा मकवानपुरका २५ वर्षीय निकेश विक, २५ वर्षीय सुरज विक तथा बागलुङका २५ वर्षीय बालकृष्ण गैरे रहेका छन्। अनुसन्धानमा निकेश विकविरुद्ध २०८१ माघ ११ गते केन्द्रीय अनुसन्धान ब्युरोमा दर्ता भएको मुद्दामा फरार अभियुक्त रहेको खुलेको छ। उनलाई आपराधिक विश्वासघात तथा अवैध लाभ सम्बन्धी मुद्दामा कारबाही प्रक्रिया अघि बढाइएको प्रहरीले जनाएको छ।

त्यस्तै २०८१ भदौ ५ गते इलाका प्रहरी कार्यालय गौशाला, महोत्तरीमा दर्ता चोरी मुद्दामा पनि उनी फरार प्रतिवादीको सूचीमा रहेको पाइएको छ।

प्रहरीका अनुसार निकेश र सुरजले मंसिर ५ गते राति करिब २ बजेतिर काठमाडौं बागबजार क्षेत्रमा भोज फुड डेलिभरी गर्दै गरेका निरज चौधरीलाई पेस्तोल देखाएर धम्क्याएका थिए। साथै, उनलाई लुटपाट गरेको उपत्यका प्रहरी कार्यालयका एसपी काजीकुमार आचार्यले जानकारी दिएका छन्।